PRESS RELEASE
October 9, 2023
Subay sa Joint Circular No. 1, series of 2017 sa Department of Energy (DOE) ug Department of Public Works and Highways (DPWH), gitahasan ang ahensiya sa DPWH sa pagdownload ngadto sa mga Electric Cooperatives sa kinatibuk-ang kantidad sa balayronon sa mga aktibidad may kalabot sa pagbalhin sa mga poste aron mapahigayon sa hinanaling panahon ang mga katuyuan o proyekto sa gobyerno, sama sa pagpalapad sa atong mga kadalanan.
Base usab sa uniform guidelines, gikinahanglan ang koordinasyon sa matag ahensiya ug angay nga mapahibalo sa Implementing Agency sama sa Department of Public Works and Highways (DPWH) ang mga Electric Cooperatives kon adunay mga proyekto diin maapektuhan ang mga linya ug serbisyo sa electric cooperative. Lakip sa maong kasabutan ang pagbayad sa saktong kantidad o “proper compensation” ngadto sa Electric Cooperatives alang sa galastuhan sa pagbalhin sa mga poste tungod sa road widening projects.
Base sa cost estimate nga gi-evaluate sa National Electrification Administration (NEA), mokabat sa kapin P157M ang gasto sa mga road widening projects gikan Cogon, Digos City hangtod Inawayan, Sta. Cruz ug Tres de Mayo, Digos City hangtod Kinuskusan, Bansalan. Isip usa ka non-stock ug non-profit nga Electric Distribution Utility ubos sa regulasyon sa mga ahensiya sa gobyerno sama ni NEA , ERC ug DOE, ang DASURECO walay gitagana nga pondo alang sa pagbalhin sa mga poste nga apektado sa road widening projects.
Apan tungod kay kini nga proyekto gitagaan ug dakong bili isip prioridad nga motubag sa aspetong seguridad sa publiko, gipahigayon sa atong Kooperatiba ang hinanaling pagbalhin sa mga linya ug poste nga nahimong peligro sa publiko.
Mikabat sa kantidad nga P70M ang gitapal sa atong DASURECO gikan sa General Fund niini. Lakip sa gitaplan nga galastuhan ang mga proyekto nga temporaryong na-suspendi tungod sa Right-of-Way (ROW) o ang mga aktibidad sa pagbalhin sa mga linya ug poste nga walay pagtugot sa mga land owners nga apektado sa proyekto.
Sa kasamtangan, ang DASURECO nagpaabot pa gihapon sa pondo o compensation gikan sa gobyerno aron mapahimutang ang pag-relocate sa uban pang mga poste nga anaa pa sa mga kadalanan.###